Мақсат: Сабақта кездесетін қиын жағдайларды бірлесіп шешу. 

Жас мамандарға «Сабақты тиімді жоспарлау және сабаққа берілген уақытты басқару» тақырыбында әдістемелік көмек көрсетілді. Коучингті бастауыш сыныптың педагог-зерттеуші мұғалімі, жас маманның тәлімгері Базарова Толқын Мухтаровна жүргізді. Кіріспе бөлімінде «Сабақтың сапасы – дұрыс жоспарда», яғни ҚМЖ құруда  сабақтың тиімділігін арттыруға, нақтырақ айтсақ, оқу мақсаты, тапсырма және дескриптор арасындағы байланыстың болуын әр мұғалім бірінші ескеру керектігі айтылды.  Жас мамандарға оқу мақсаттары таратылды. Оқу бағдарламасына сай берілген оқу мақсатынан сабақ мақсатына құру тапсырылды.  Оқу мақсаты – тапсырма – дескриптор тығыз байланысын  ҚМЖ (қысқа мерзімді жоспар) бойынша тексеру жүргізілді.

Дифференциация және тапсырмалар құрылымы

Біздің алдымызда тұрған негізгі мәселе – дифференциация. Барлығына бірдей тапсырма беруден қалай қашу керек? Көп жағдайда жас мамандар барлық оқушыға бірдей деңгейдегі тапсырма беріп, оқу нәтижелері төмен немесе дарынды білім алушылардың жалығуы сияқты қиындықтарға тап болып жатады. Сондықтан тапсырмалар мен ресурстарды саралау, білім алушылардың қажеттіліктерін ескеру, оқу нәтижелері төмен балаларға қосымша нұсқаулар беру қажеттігі айтылды. Тиімді әдіс-тәсілдер үлгі ретінде көрсетілді.

Тайм-менеджмент: 45 минутты қалай игеру керек?

Келесі маңызды қарастырылған мәселе – уақытты басқару. Сабақтың қоңырау соғылғанда аяқталмай қалуы немесе рефлексияға уақыт жетпеуі – үлкен проблема.

• Тәжірибелік кеңес: Сабақтың әр кезеңіне таймер қолданып, «артық» тапсырмаларды алдын ала іріктеп қойыңыз.
• Кейс: Егер тақырыпты түсіндіріп үлгермей, сабаққа 5 минут қалса, не істеу керек?. Мұндайда оқушылардан қай жері түсініксіз болғанын сұрап, кері байланыс алу маңызды. Бұл келесі сабақты сапалы жоспарлауға негіз болады.

Оқушыны қызықтырудың белсенді әдістері

Сабақты тартымды аяқтау үшін екі тиімді әдісті ұсынамын:

1. «Аяқталмаған ой» әдісі: Тақырыпты ең қызықты жерінде тоқтатып, жалғасы келесі сабақта болатынын айтып, интрига қалдырыңыз.
2. «30 секундтық спик»: Бұл сөйлеу мәдениетін қалыптастырады. Оқушы 30 секунд ішінде сабақтың ең маңызды түйінін айтып үлгеруі керек. Бұл баланың уақытты сезінуіне және ақпаратты іріктеуіне үйретеді.